Het Drèents Liedtiesfestival 2018 (DLF18) komp der an! Het grootschaolige liedtiesfestival wordt veur de zeuvende maol organiseerd met as doel het schrieven, oetvoeren en vastleggen van neie Drèentstaolige kwaliteitsmeziek. De organisatie -Stichting REUR- rop alle mezikaanten en tekstschrievers van Drèentstaolige meziek op um liedties in te sturen.

De inzunden liedties wordt deur een kemmissie, bestaonde oet meziek- en tekstprofessionals belusterd en weugen. Oet alle inzendings wordt de beste tien liedties keuzen veur de finale. Begun mei wordt de selectie van de tien finalisten bekend maakt via RTV Drenthe.

In de anloop hen de finale zal Stichting REUR in samenwarking met The Bake Shop warkwinkels oet het stro zetten um belangstellenden en inzenders te helpen en bijstaon bij het maken van heur zölfschreven liedties.

De finale van het Drèents Liedtiesfestival is op zaoterdag 2 juni 2018 in het ATLAS Theater in Emmen. Het Drèents Liedtiesfestival wordt LIVE oetzunden op TV Drenthe en via het internet.

Het Drèentse pebliek stemt via sms op heur favoriete liedtien. Een inholdelijke vakjury zal de liedties ok beoordelen. Beide oetslagen bepaolt gezamelk de oeteindelke winnaar van het Drèents Liedtiesfestival.

De editie van 2017 wuur wunnen deur Isa Zwart met het nummer Mamme see  dat schreven wuur deur Roy Keuter en Rowdy Prins. In het naojaor van 2017 wuur -op veurdracht van Stichting REUR- Isa Zwart verkeuzen metan te doen an het Europees songfestival veur minderheidstaolen.

Op dat SUNS EUROPE festival in Udine, wun zie de pebliekspries. Ok kreeg Isa Zwart de culturiele pries 2017 van de gemiente Emmen toebedield.

Inzendings kunt daon worden tot 13 april 2018 hen Stichting REUR, Laan van de Marel 30, 7823 CA Emmen of via wetransfer.com hen: Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. o.v.v. DLF18. Je inzending möt bestaon oet een tekst en een opname van het liedtien.

Rieglementen, meer infermatie en neis kuj vinden op www.drentsdlf.nl, www.stichtingreur.nl, of via Facebook en Twitter under de naam @DrentsDlf